O‘zbekiston sanoatini rivojlantirishning yangi o‘sish yo‘nalishlari muhokama qilindi

Tadbirda O‘zbekiston Respublikasi Bosh vazirining o‘rinbosari – iqtisodiyot va moliya vaziri Jamshid Qo‘chqorov, “McKinsey & Company” kompaniyasining global boshqaruvchi hamkori Bob Sternfels, shuningdek, Jahon banki, Xalqaro moliya korporatsiyasi va boshqa xalqaro tashkilotlar ekspertlari, davlat idoralari vakillari hamda sanoat va biznes sohasi mutaxassislari ishtirok etdi.

Forum davomida ishtirokchilar mamlakat sanoatini uzoq muddatli rivojlantirish, uning raqobatbardoshligini oshirish va iqtisodiyotning barqaror o‘sishini ta’minlashga qaratilgan strategik yondashuvlar yuzasidan muhokamalar olib bordilar.

Jumladan, tadbir doirasida O‘zbekistonning 2035-yilgacha bo‘lgan sanoat strategiyasi konsepsiyasi yuzasidan fikr almashildi. Unda sanoatni rivojlantirishning asosiy yo‘nalishlari, ishlab chiqarish samaradorligini oshirish, yuqori qo‘shilgan qiymatli mahsulotlar ishlab chiqarishni kengaytirish hamda mamlakatning iqtisodiy salohiyatidan yanada samarali foydalanish masalalariga e’tibor qaratildi.

Forumning panel muhokamalarida sanoat rivojlanishining global tendensiyalari, xalqaro tajriba, shuningdek, O‘zbekiston uchun mavjud imkoniyatlar va yuzaga kelishi mumkin bo‘lgan to‘siqlar ko‘rib chiqildi. Xususan, investitsiyalarni jalb qilish, yirik xalqaro investorlarni jalb etish, global qiymat zanjirlariga integratsiyalashish, eksport salohiyatini kengaytirish, ishlab chiqarish tarmoqlarini modernizatsiya qilish hamda sanoatning yangi o‘sish yo‘nalishlarini shakllantirish masalalariga to‘xtalib o‘tildi.

Shuningdek, forum doirasida sanoatning muhim tarmoqlari bo‘yicha tematik muhokamalar tashkil etildi. Ularda tog‘-kon sanoati va chuqur qayta ishlash, mashinasozlik, avtomobilsozlik, iste’mol tovarlari ishlab chiqarish, kadrlar tayyorlash, energetika, transport, infratuzilma va investitsiyalarni rivojlantirish bilan bog‘liq ustuvor masalalar muhokama qilindi. Ishtirokchilar tegishli sohalarning rivojlanish imkoniyatlari, mavjud to‘siqlar va istiqboldagi vazifalar yuzasidan o‘z fikr va takliflarini bildirdilar.

Forum strategiya konsepsiyasini takomillashtirish, sanoatni rivojlantirish bo‘yicha ustuvor yo‘nalishlarni aniqlashtirish hamda kelgusidagi ishlarni izchil davom ettirishga qaratilgan muhim muloqot maydoni sifatida ahamiyat kasb etdi.